Staibock Cup Maienfeld vom 26.05.18

Dr TV Maienfeld fieret  das Johr sis 150 Johr Jubiläum.  Zu däm Alass hen d Maiafelder dr Staibock Cup ins Leba gruafa. Dä Cup söll da Turner us dr ganza Schwiz als „DÄ“ Vorbereitigswettkampf diana.
Rund 1100 Turner und Turnrinna us 45 verschiedena Verein hend sich für de Cup agmolda ka. Mitunter au der TV-  und TnV us Trimmis.

Miar Fraua vom Team Aerobic hend üsara Saisonuftakt leider mit einara Turnerin weniger starta müassa. D Maria Grazia isch ei Wucha vor am Staibock Cup verunfallt und fallt leider für da ganzi Summer us.
So sind am 26. Mai 10 Turnerinna am 16:05 Uhr ufem Wettkampfteppich gstanda. Voll motiviart und a biz nervös ;-) hend miar üsari lässig Kombi am na super Publikum zeiga chöna. Üsara treu Fanclub isch an dem Cup mit drbi gsi und het üs mächtig agfüret. Bi dära Glägaheit; besta Dank allna Familiamitglieder und Turner/inna vom TV und TnV für euri Unterstützig!
Miar hend laider nit dia Nota erreicht, wo ma sich erhofft het. Mit dr Endnota vo ma 8.63 hend miar üsa erst Wettkampf in dera Saison gstartet. Dafür simmer jetzt umso meh motiviart für ds Kantonala Turnfest in Romanshorn.

Dr TV Trimmis het sich bir Barrasektion super präsentiart und d Nota 9.06 erkämpft. Bi dr Pändelstafetta hemer üsara TVT nomol mächtig agfüret. Das hed sich denn au uszahlt :-). In dera Disziplin hends d Goldmedaille gholt. Nomol recht herzlicha Glückwunsch!

Nochem Z‘nacht het in dr Turnhalla Lust d Gala Show statt gfunda. Dia Verein, wo am Tag dr 1. und 2. Platz beleit hend, hend ihres Könna nomol unter Bewies stella törfa. Der mol aber nit nur da Wertigsrichter, sondern au am Publikum. „Üsari“ Stimm isch zur Nota vo da Wertigsrichter dazua zehlt worda und so hend sich as paar Verein chöna wieter uffa kämpfa. Näbst dena 16 Verein het au dr Kunstturner Pablo Brägger und d Kunstturnerin Thea Brogli a unglaublichi Darbütig präsentiart.
Witeri spektakuläri Showacts het The Blackouts, d Steep Dance Crew und d 4-er Kunstrad Sirnach bota. Dia Gala Show isch eifach dr Hammer gsi! Das isch würklich turna uf höchstem Niveau gsi.

Noch dr Gala hend miar üseri Tanz- und Gsangskünst an dr Staibock Party unter Bewies stella chöna :-).  As isch an tolla Wettkampftag gsi!

I freua mi scho uf z Turnfest in Romanshorn. Aber  vorher heissts no – trainiera, trainiera, trainera.


Sylvana Eggimann