Tannzapfencup Dussnang 28.05.16

Am Samschti- Morge hei sech 10 motivierti Team- Aerobic- Froue inkl. Fähnrich & Mentalcoach ;) bi strahlend schönem Wätter bir Dopputurnhaue z‘ Trimmis troffe. Schnäu si d’Turnerinne ufd Outo verteilt gsi und de ischs los gange Richtig Dussnang (de graue Wuuche* entgägä…).
Ume Mittag um simer de im Thurgou acho und hei bi meh oder weniger schönem Wätter üsi Konkurränz unger d’Lupe gno. Me het fasch chönne zueluege, wie bim beobachte bi jedere vo üs Froue d‘ Närvosität chli gstiige isch… ( Schins heig gwüssi Teams am Morge i strömendem Rägä ihri Darbietig müesse zeige… )
Je speter dr Namitag, desto schöners Wätter.  Doch nüt mit sünnele, plötzlech isch schnäu haubi 5i gsi u mir si üs go fertig vorbereite.

17.30 hets Ärnscht guute*: „Team Aerobic vom Turnerinne Verein Trimmis unger dr Leitig vor Carmen de Sousa!“
Mir hei mit dr Sunne umd Wett gstrahlet u aui Aues gä,  für üsi Choreo am Publikum z‘zeige :)

D’Nicci het sech e VIP- Parkplatz gsicheret und so heimer nume e Chatzesprung vom Wettkampfplatz entfernt üse „Lagerplatz“ gha ;) Abrakadabra… Üsi Präsidäntin het e Chüutäschä inkl. prozäntigem Inhaut fürezouberet. Z’Beschte für die agspannte Närve z’beruige ;)
Nachdäm d’Aspannig het nocheglo macht sech langsam es Hungergfüu bemerkbar und mir schlendere richtig Ässenszäut.

Üse Wäg füehrt üs bi de Kampfrichter resp. üsere Team Aerobic- Note verbi :)
D’Carmen lüftet vor der Bekanntgab no es guet ghüetets Gheimnis…
In Dussnang starte keni 35+ Gruppe, das heisst, mir si us Aktivi gwärtet worde und hei d’Note: 8.67 erturnt und si dermit ir Mitti vor Ranglischte azfinge :)

Aschliessend heimer üse wouverdient Znacht zuenis gno und üsi Schlofplätz usfindig gmacht.
Die „echten Helden“ hei ir Turnhaue für Stimmig gsorgt. Nach usgibigem „Tanzbei- Schwinge“ simer go lige, und hei e meh oder weniger ruigi Nacht uf thurgouer Bode verbrocht…

Nachemne usgibige Zmorge heimer am Sunntivormittag de wider dr Heiwäg unger d’Reder gno.

Isch es super Wuchenänd gsi mit öich Froue :) „hiah hiah hiah ho…“


*Wolke
*gegolten

"Geschrieben von unseren waschechten Bernerin, Andrea Ledermann - Anmerkung der Redaktion! ;)"